的士業「呢行自己搞死自己」? 究竟係邊個搞死自己?
沙田有長者準備過海去上環東華醫院睇病，點知喺的士站等咗一陣，幾架車都疑似唔肯載。
有同行司機拍低片段上網，直言睇到都覺得心淡，仲話「呢行自己搞死自己」。
其實筆者好多時排的士站, 都會預到好多依D情況…. 由其係接近交更前後2小時… 非常多. 筆者試過一更次內2次都同樣接載前車所放棄的乘客。
其實我想各位反醒一下, 包括睇緊文章既你, 同埋你. 究竟邊個搞死香港的士佬?
香港的士業今日搞到咁，真係唔好再扮無辜。
拒載、揀客、兜路、濫收車資、態度惡劣，呢啲問題唔係一兩單「個別事件」，而係成個行業長年累積出嚟嘅惡習。
最諷刺係，當乘客一次又一次受氣，業界反應唔係真正檢討服務，而係最擅長怪網約車、怪政府、怪市場。但如果自己服務咁差，點解乘客一定要忍你？
更現實嘅問題係：香港人唔係唔肯畀錢，係唔想畀錢買受氣。當市民可以用更透明、更方便、更有禮貌嘅方式出行，點解仲要留喺一個連基本接客都做唔好的制度入面？
講到底，搞死香港的士業嘅，唔係單一對手，係業界自己多年來對爛習慣視而不見，對改革敷衍了事。唔改，唔死都難。
香港的士，最爛唔係的士，係那個臭爛嘅交更制度。
上更司機遲到，下更司機被迫等，生意時間就啖啖肉被食。
告票 易通行 歸屬搞不清，壞車無人修，下更司機開工就瓜瓜嘈 。
上更司機明知車有問題唔報，下更司機接手先至知要開去車房，成本誰來付？
呢個制度，根本就是上更坑下更、打理人瞓覺、司機互相鬥氣。
遲交更、鬧交更、告票扯皮、壞車拖糧，成個行業就係一個「互相折磨」嘅循環。
市民截車難、拒載多、服務差，只係話係司機既問題？
司機要係黃金時間等人交更、要背黑獲、要修車、要等打理人，點解你鬧得咁輕鬆？
更可笑的是，當發生問題，打理人第一反應係「司機自己搞」、「唔係我問題」，然後走數。
結果呢？乘客受氣，司機受罪，車行發財，制度繼續爛。
如果连最基本的交更都搞唔好，點望你服務質素好？
如果連打理人都唔肯負責，點望司機有動力做好？
如果連上更下更都互相坑，點望行業有未來？
的士業要反醒，不是反醒「司機態度」，而是反醒那個令司機亙相仇恨、放縱管理、誰都唔負責嘅臭爛制度。
制度不改，的士業永遠都是「自己搞死自己」。